اسلام آباد۔8جنوری (اے پی پی):ایف آئی اے انٹرپول پاکستان نے کامیاب کارروائیاں کرتے ہوئے یو اے ای سے سنگین جرائم میں مطلوب اشتہاری سمیت 3 ملزمان گرفتار کر لئے ۔ ترجمان ایف آئی اے کے مطابق یو اے ای سے گرفتار اشتہاری ملزم کو ملتان ایئرپورٹ منتقل کر دیا گیا۔ گرفتار ملزمان میں محمد ناصر، جہانزیب اور ساجد علی شامل ہیں ۔گرفتار ملزمان پنجاب اور کے پی پولیس کو مطلوب تھے۔ملزم محمد ناصر لودھراں پولیس، ملزم جہانزیب رحیم یار خان پولیس کو ڈکیتی کے مقدمات میں مطلوب تھے جبکہ ملزم ساجد علی مردان پولیس کو قتل کے مقدمے میں مطلوب تھا۔ ایف آئی اے این سی بی انٹرپول پاکستان نے ملزمان کی گرفتاری کے لئے ریڈ نوٹسز جاری کئے تھے۔ ایف آئی اے امیگریشن ملتان نے ملزمان کو متعلقہ پولیس حکام کے حوالے کر دیا ہے ۔