ریاض۔10جون (اے پی پی):خلیج تعاون کونسل( جی سی سی)نے وسطی غزہ کے نصیرات مہاجر کیمپ پر اسرائیلی حملے کی مذمت کی ہے جس میں 274 افرادشہید اور متعدد زخمی ہوئے ہیں۔اردو نیوز کے مطابق کونسل نے اپنے بیان میں کہا کہ بین الاقوامی برادری فلسطینیوں کے خلاف اسرائیل کے مسلسل اور منظم جرائم کو روکنے کے لیے اقدامات کرے۔بیان میں نصیرات مہاجر کیمپ پر حملے کو ایک گھنائونا اور دہشت گردانہ اقدام قرار دیا گیا۔
علاوہ ازیں جی سی سی کے وزارتی اجلاس میں وزرا نے کہا کہ غزہ میں جنگ کےخاتمے کے حوالے سے امریکی صدر جو بائیڈن کی طرف سے پیش کردہ تجاویز کو سنجیدگی اور مثبت طور پر لینا ضروری ہے جو غزہ میں جنگ بندی کا باعث بنے گی۔وزارتی اجلاس میں سعودی وزیر خارجہ شہزادہ فیصل بن فرحان نے بھی شرکت کی۔علاوہ ازیں اسلامی تعاون تنطیم (او آئی سی) نے غزہ میں اقوام متحدہ کی ریلیف اینڈ ورکس ایجنسی کے تحت ایک سکول پر اسرائیلی بمباری کی مذمت کی ہے جہاں بے گھر فلسطینی پناہ لیے ہوئے تھے۔