آسٹریلیا کے شہر سڈنی کے بونڈی بیچ پر ہونے والے حملے سے متعلق اہم انکشافات سامنے آ گئے ہیں جن کے مطابق حملے میں ملوث بھارتی شہری ساجد اکرم اور اس کے بیٹے نوید اکرم کے بھارتی پاسپورٹس منظرِ عام پر آ گئے ہیں۔ دستاویزات سے واضح ہوتا ہے کہ بھارتی سفارتخانے کو ابتدا ہی سے حملہ آوروں کی بھارتی شہریت کا علم تھا تاہم اس کے باوجود حقائق کو منظر عام پر لانے میں تاخیر کی گئی۔

ذرائع کے مطابق ساجد اکرم کا بھارتی پاسپورٹ بھارتی سفارتخانے کی جانب سے 24 فروری 2022 کو 10 سال کی مدت کے لیے جاری کیا گیا تھا جس کی تاریخِ تنسیخ 23 فروری 2032 درج ہے۔ پاسپورٹ میں ساجد اکرم کی جائے پیدائش اور مستقل پتہ بھارتی ریاست تلنگانہ کے شہر حیدرآباد کے طور پر درج ہے، جو ان کی بھارتی شہریت کی تصدیق کرتا ہے۔

ذرائع کا کہنا ہے کہ بھارتی حکام کو حملے کے پہلے ہی دن ملزمان کی شناخت اور شہریت کا علم تھا تاہم جان بوجھ کر یہ معلومات فوری طور پر سامنے نہیں لائی گئیں۔ اس دوران بھارتی میڈیا کی جانب سے حملہ آوروں کو پاکستانی ظاہر کرنے کی کوشش کی گئی اور پاکستان کے خلاف گمراہ کن پروپیگنڈا کیا گیا۔تاہم اگلے ہی روز حقائق سامنے آنے کے بعد واضح ہو گیا کہ سڈنی حملے میں ملوث افراد پاکستانی نہیں بلکہ بھارتی شہری تھے۔

دوسری جانب برطانوی جریدے کی ایک رپورٹ میں یہ بھی انکشاف کیا گیا ہے کہ آسٹریلیا نے 2020 میں بھارتی خفیہ ایجنسی ’را‘ کے دو اہلکاروں کو غیر قانونی سرگرمیوں میں ملوث ہونے پر ملک بدر کیا تھا۔ رپورٹ کے مطابق یہ اہلکار آسٹریلیا میں ایک مبینہ جاسوسی نیٹ ورک کا حصہ تھے اور مقامی بھارتی کمیونٹی کی پروفائلنگ میں بھی ملوث تھے۔

ملزم نوید اکرم پر فرد جرم عائد

آسٹریلیا کے شہر سڈنی کے بیچ پر فائرنگ کرنے والے ملزم پر فرد جرم عائد کر دی گئی۔غیر ملکی میڈیا رپورٹس کے مطابق آسٹریلین پولیس نے بتایا کہ زخمی حملہ آور نوید اکرم کو ہوش میں آنے کے بعد فرد جرم عائد کی گئی۔

پولیس کا کہنا ہے کہ نوید اکرم اور اس کے والد ساجد اکرم نے ماں کو حملے کی منصوبہ بندی سے لاعلم رکھا اور کارروائی سے پہلے گھر سے 20 کلومیٹر دور کرائے پر جگہ لی جبکہ ماں کو فشنگ ٹرپ پر جانے کا بتایا گیا۔

واضح رہے کہ بونڈی بیچ حملے میں دو مسلح افراد نے فائرنگ کر کے 15 افراد کو ہلاک اور 40 کو زخمی کیا تھا۔ ہلاک ہونے والے ملزم کی شناخت ساجد اکرم کے نام سے ہوئی جو بھارت کے شہر حیدرآباد کا رہائشی تھا جبکہ اس کا بیٹا نوید اکرم آسٹریلوی شہریت رکھتا ہے۔

فلپائن کے صدارتی ترجمان کلیری کاسترو نے کہا ہے کہ حملہ آوروں کے فلپائن کے دورے کے دوران دہشتگرد ٹریننگ کا کوئی ثبوت نہیں ملا اور فلپائن کو داعش کے تربیتی مرکز کے طور پر پیش کرنے والی رپورٹس مسترد ہیں۔

پولیس نے مزید بتایا کہ بونڈی بیچ پر دونوں حملہ آوروں نے فوٹ بریج کے مقام کو انتخاب کیا اور کارروائی کا آغاز کیا جس کے نتیجے میں نوید اکرم پر 15 قتل سمیت متعدد جرائم کے الزامات عائد کیے گئے ہیں۔