بھارتی ریاست تامل ناڈو کے دارالحکومت چنئی میں نیوزی لینڈ سے آنے والا ایک بچہ ریسٹورنٹ میں کھانے کا بل دیکھ کر حیران رہ گیا جس کی ویڈیو سوشل میڈیا پر تیزی سے وائرل ہو گئی ہے۔
وائرل ویڈیو میں دیکھا جا سکتا ہے کہ بچہ اپنی والدہ کے ہمراہ ریسٹورنٹ سے باہر نکلنے کے بعد 7 دسمبر 2025ء کی تاریخ والا کاغذی بل غور سے دیکھتا ہے اور مجموعی رقم جان کر دنگ رہ جاتا ہے۔ بل میں بے بی کارن منچورین، بونڈا، دہی پاپڑی، اسپیشل فالودہ، اڈلی، پنیر مسالا ڈوسا اور ویج نوڈلز شامل ہیں۔
بچے نے ایک ایک ڈش گنتے ہوئے حیرت کا اظہار کیا کہ سات مختلف آئٹمز کا مجموعی بل صرف تقریباً 30 نیوزی لینڈ ڈالرز، یعنی 1502 بھارتی روپے بنا۔ ویڈیو میں اس کا کہنا ہے کہ نیوزی لینڈ میں اتنی رقم میں بمشکل دو سے تین چیزیں ہی ملتی ہیں۔
انسٹاگرام پر شیئر کی گئی اس ویڈیو پر صارفین کی جانب سے دلچسپ تبصرے سامنے آ رہے ہیں۔ بعض صارفین نے کہا کہ اگر یہ بچہ بھارتی تنخواہوں کی سلپس دیکھ لے تو اس کا ردِعمل مزید دلچسپ ہوگا جبکہ کچھ کا کہنا تھا کہ سات آئٹمز کے لیے 1500 روپے اب بھی مہنگے ہیں۔