گزشتہ کئی روز سے آئی سی سی چیمپئنز ٹرافی کے حوالے سے مختلف خبریں گردش کررہی
ہیں جن میں سے ایک خبر بھارتی کرکٹ ٹیم کی پاکستان آمد کی بھی تھی-
تاہم اب کرکٹ شائقین کے لیے بری خبر یہ ہے کہ آئی سی سی چیمپئنز ٹرافی کھیلنے کے
لیے بھارتی ٹیم نے پاکستان آنے سے انکار کردیا ہے۔
موصولہ رپورٹس کے مطابق بھارتی کرکٹ بورڈ کے ذرائع کا کہنا ہے کہ کرکٹ بورڈ آئی سی
سی سے بھارت کے میچز سری لنکا یا دبئی میں کرانے کی درخواست کرے گا۔
دوسری جانب آئی سی سی چیمپئنز ٹرافی کے میچز اگلے سال فروری سے مارچ کے درمیان
پاکستان میں شیڈول کیے گئے ہیں۔
جبکہ پاکستان کرکٹ بورڈ کی جانب سے بھارت کے تمام میچز لاہور میں کرانے کی تجویز دی
گئی تھی۔ اور بھارتی کرکٹ بورڈ کے نائب صدر راجیو شکلا کی جانب سے مئی میں کہا گیا
تھا کہ حکومت کی اجازت کے بعد ہی بھارتی ٹیم کو پاکستان بھیجا جائے گا۔
واضح رہے کہ سال 2008ء ایشیا کپ کے بعد سے اب تک بھارتی ٹیم نے کبھی بھی پاکستان
میں کوئی میچ نہیں کھیلا ہے۔