اسلام آباد: لاہور، کراچی اور اسلام آباد سمیت ملک کے مختلف شہروں سے نکلنے والے یوم عاشورہ کے جلوس اختتام پذیر ہو گئے۔
تفصیلات کے مطابق کراچی میں یوم عاشور کا مرکزی جلوس نشتر پارک سے شروع ہو کر حسینہ ایرانیاں کھارادر پر اختتام پذیر ہوا۔
کراچی میں یوم عاشورہ کا مرکزی جلوس نشتر پارک سے بوتراب اسکاؤٹ کی قیادت میں برآمد ہوا۔ جو اپنے مقررہ راستوں نمائش، ایم اے جناح روڈ، پریڈی، صدر، تبت سینٹر، جامع کلاتھ، بولٹن مارکیٹ سے ہوتا ہوا حسینیہ ایرانیاں امام بارگاہ کھارادر پر اختتام پذیر ہوا۔
لاہور میں نثار حویلی سے برآمد ہونے والا شبیہ ذوالجناح کا مرکزی جلوس اپنے روایتی راستوں سے ہوتا ہوا کربلا گامے شاہ پر اختتام پذیر ہوا۔
اسلام آباد میں بھی یوم عاشور کے تمام جلوس پرامن طور پر اختتام پذیر ہو گئے۔ راولپنڈی میں یوم عاشورہ کا مرکزی جلوس جامع مسجد روڈ پہنچا جہاں عزاداران نے نماز مغربین ادا کی۔ جلوس اپنے مقررہ راستوں سے ہوتا ہوا امام بارگاہ قدیم پہنچ کر اختتام پذیر ہوا۔
فیصل آباد میں امام بارگاہ قصر ابو طالب غلام محمد آباد شاہی چوک سے مرکزی جلوس برآمد ہوا۔ جلوس اپنے روایتی راستوں سے ہوتے ہوئے امام بارگاہ قصر ابو طالب غلام محمد آباد شاہی چوک کے باہر اختتام پذیر ہوا۔
ملتان میں آستانہ لعل شاہ سے برآمد ہونے والا مرکزی جلوس کربلا شاہ شمس پہنچ کر اختتام پذیر ہوگیا۔ گلگت میں یوم عاشور کا مرکزی ماتمی جلوس مرکزی امامیہ مسجد پہنچ کر اختتام پذیر ہوا۔ یوم عاشور کے مرکزی جلوس میں گلگت اور مضافات سے 28 ماتمی دستے شامل تھے۔
اوکاڑہ میں مرکزی جلوس اپنے روایتی راستوں سے ہوتا ہوا ایوان حسین ڈی بلاک پہنچ کر اختتام پذیر ہوگیا۔
مانسہرہ میں یوم عاشور کا مرکزی جلوس امام بارگاہ مفتی آباد پر اختتام پذیر ہوا۔ مانسہرہ پیراں اور پارس کے جلوس بھی اختتام پذیر ہو گئے۔
یہ بھی پڑھیں: یومِ عاشور کو پرامن رکھنے پر ہر افسر و اہلکار کے مشکور ہیں، شہباز شریف
کوئٹہ میں مرکزی جلوس اپنے روایتی راستوں سے ہوتا ہوا بشت زینب قبرستان پہنچ کر اختتام پذیر ہوا۔ دسویں محرم الحرام کا مرکزی جلوس چوک شہدا علم دار روڈ سے برآمد ہوا۔
37 دستوں پر مشتمل یوم عاشورہ کا جلوس لیاقت بازار، پرنس روڈ علم دار روڈ سے گزرا۔ عزادار نے میزان چوک پر نماز ظہرین ادا کی۔ مرکزی جلوس کی حفاظت کے لیے سیکیورٹی کے سخت انتظامات کیے گئے تھے۔
پشاورمیں امام بارگاہ علمدار کربلا سے یوم عاشورہ کا مرکزی ماتمی جلوس برآمد ہوا۔ جو مرکزی راستوں سے ہوتا ہوا دوبارہ امام بارگاہ علمدار پر اختتام پذیر ہوا۔
حیدرآباد میں یوم عاشور کا مرکزی جلوس کربلا دادن شاہ پہنچ کر اختتام پذیر ہوا۔ جلوس انجمن حیدری کے زیر اہتمام قدم گاہ مولا علی سے برآمد ہوا تھا۔
مٹیاری میں یوم عاشورہ کے ماتمی جلوس بھٹ شاہ، مٹیاری، نیوسعیدآباد میں اختتام پذیر ہوگئے۔ لاڑکانہ میں یوم عاشور کا مرکزی ماتمی جلوس روایتی راستوں سے ہوتا ہوا پاکستانی چوک پر پہنچ کر اختتام پذیر ہوگیا۔ پاکستانی چوک پر نماز مغربین ادا کی گئی۔
واضح رہے یوم عاشور پر سیکیورٹی کے پیش نظر لاہور، کراچی، پشاور، کوئٹہ سمیت ملک بھر کے مختلف اضلاع میں موبائل فون اور انٹرنیٹ سروس جزوی طور پر معطل کی گئی تھی۔ جسے رات گئے بحال کر دیا گیا۔