ملک کے مختلف حصوں میں شدید دھند کے باعث معمولاتِ زندگی متاثر ہو گئے ہیں۔ پنجاب، سندھ، بلوچستان اور خیبر پختونخوا کے کئی علاقوں میں حدِ نگاہ انتہائی کم ہونے سے موٹر ویز اور قومی شاہراہوں پر ٹریفک کی روانی متاثر ہوئی ہے۔
موٹروے پولیس کے مطابق ایم ون موٹروے صوابی سے برہان جبکہ ایم فور موٹروے شیر شاہ سے شام کوٹ تک دھند کے باعث ہر قسم کی ٹریفک کے لیے بند کر دی گئی ہے۔
دوسری جانب اسلام آباد کے مختلف سیکٹرز اور نواحی علاقوں میں بھی شدید دھند چھائی ہوئی ہے جس کے باعث گاڑی چلانے والوں کو شدید مشکلات کا سامنا ہے۔
قومی شاہراہ پر حدِ نگاہ کم ہونے کے باعث ٹریفک سست روی کا شکار ہے، جبکہ موٹروے پولیس نے شہریوں کو غیر ضروری سفر سے گریز اور دورانِ سفر فوگ لائٹس استعمال کرنے کی ہدایت کی ہے۔موٹروے پولیس کا کہنا ہے کہ دھند کی صورتحال بہتر ہوتے ہی سڑکوں کو ٹریفک کے لیے بحال کر دیا جائے گا۔