پنجاب پولیس کے ترجمان نے دعویٰ کیا ہے کہ میانوالی کی قبول خیل پولیس چیک پوسٹ پر اتوار اور پیر کی درمیانی شب دہشت گردوں کا حملہ ناکام بنا دیا گیا ہے۔
ترجمان پنجاب پولیس نے ایک بیان میں کہا کہ ’میانوالی کے قبول خیل پولیس چیک پوسٹ پر رات گئے دہشت گردوں نے راکٹ لانچرز اور ہینڈ گرنیڈ سے حملہ کیا تاہم پنجاب پولیس نے دہشت گردوں کا حملہ ناکام بنا دیا جبکہ دہشت گرد فرار ہوگئے۔‘
پولیس ترجمان کے مطابق ‘12 سے 14 دہشت گردوں نے رات کی تاریکی کا فائدہ اٹھا کر قبول خیل چیک پوسٹ پر راکٹ لانچرز اور ہینڈ گرنیڈز سے حملہ کیا۔‘
ترجمان نے بتایا کہ ’چیک پوسٹ پر تعینات پنجاب پولیس کے جوان الرٹ ہونے کے باعث حملہ ناکام بنا دیا گیا، پولیس نے شدید جوابی فائرنگ سے دہشت گردوں کا حملہ پسپا کر دیا۔‘
پولیس ترجمان کے مطابق حملے میں 2 پولیس جوان معمولی زخمی ہوئے ہیں جبکہ مفرور دہشتگردوں کی گرفتاری کے لیےعلاقے میں سرچ آپریشن شروع کردیا گیا ہے۔‘
آئی جی پنجاب ڈاکٹرعثمان انور نے دہشت گردوں کا حملہ ناکام بنانے پر پولیس چیک پوسٹ قبول خیل کے بہادر اہلکاروں کو شاباش دی۔
ان کا کہنا تھا کہ گزشتہ چند ماہ میں پنجاب پولیس پر دہشت گردوں کا یہ 9 واں حملہ ہے جو ناکام بنایا گیا،پنجاب پولیس بین الصوبائی سرحدی چوکیوں پر دہشت گردوں کے خلاف سیسہ پلائی دیوار ہے۔
وفاقی وزیرداخلہ محسن نقوی کی میانوالی میں چیک پوسٹ پردہشتگردوں کا حملہ ناکام بنانے پر پولیس کو سراہتے ہوئے کہا ہے کہ ’پنجاب پولیس نے ایک بار پھر فدہشتگردوں کے ناپاک عزائم کو ناکام بنایا۔