یوم آزادی کے موقع پر سندھ بھر میں امن و امان برقرار رکھنے کے لیے دو روز کے لیے دفعہ 144 نافذ کرنے کا فیصلہ کیا گیا ہے۔ وزیر داخلہ سندھ ضیاالحسن لنجار نے سندھ اسمبلی اجلاس کے بعد میڈیا سے گفتگو کی۔
ضیاالحسن لنجار نے کہا کہ آزادی کا دن خوشی کا موقع ہے لیکن اس موقع پر ہوائی فائرنگ انتہائی خطرناک اور غلط عمل ہے۔ شہریوں کو چاہیے کہ خوشی کے اظہار کے لیے محفوظ طریقے اپنائیں اور اسلحہ استعمال نہ کریں۔
انہوں نے بتایا کہ دفعہ 144 کے نفاذ کے تحت ہوائی فائرنگ، اسلحے کی نمائش اور دیگر غیر قانونی سرگرمیوں پر پابندی ہوگی تاکہ عوام اپنی خوشیاں امن و امان کے ساتھ منا سکیں۔
وزیر داخلہ کا کہنا تھا کہ سندھ حکومت یوم آزادی بھرپور طریقے سے منا رہی ہے مختلف شہروں میں سرکاری اور غیر سرکاری تقریبات کا سلسلہ جاری ہے اور اس موقع پر سیکیورٹی کے بھی سخت انتظامات کیے گئے ہیں۔