محکمہ پاسپورٹس نے پاکستانی پاسپورٹ سے متعلق گردش کرتی خبروں کی وضاحت کرتے ہوئے کہا ہے کہ پاسپورٹ کے ڈیزائن یا بنیادی تحریر میں کوئی تبدیلی نہیں کی جا رہی۔
ترجمان محکمہ پاسپورٹس کے مطابق نئے پاسپورٹس میں صرف جدید سیکیورٹی فیچرز شامل کیے جا رہے ہیں تاکہ ان کی بین الاقوامی ساکھ اور تحفظ میں مزید بہتری لائی جا سکے۔
بیان میں واضح کیا گیا کہ نئے پاسپورٹس میں شہری کے والد کے ساتھ والدہ کا نام بھی شامل کیا جائے گا جبکہ ویزا صفحات پر پاکستان کے مختلف صوبوں کی تاریخی عمارات کی تصاویر پرنٹ کی جائیں گی تاکہ ملکی ثقافت اور ورثے کی نمائندگی ہو سکے۔
محکمہ پاسپورٹس نے زور دیتے ہوئے کہا کہ اسرائیل کے حوالے سے پاسپورٹ پر درج جملہ ویسے ہی برقرار رہے گا اور اس میں کسی قسم کی تبدیلی یا ترمیم نہیں کی جا رہی۔
ترجمان کے مطابق جدید سیکیورٹی خصوصیات کا مقصد پاسپورٹس کو جعلسازی سے محفوظ بنانا اور پاکستانی شہریوں کو بین الاقوامی سطح پر بہتر سہولیات فراہم کرنا ہے۔