پاکستان کے مشہور ٹک ٹاکر ڈکی بھائی کے بعد اب سابق کرکٹر اور قومی ٹیم کے سابق کپتان وسیم اکرم بھی ایک آن لائن ایپ کی وجہ سے مشکلات کا شکار ہوگئے ہیں۔
نیشنل سائبر کرائم انویسٹی گیشن ایجنسی (NCCIA) لاہور میں ایک شہری کی جانب سے وسیم اکرم کے خلاف کھیلوں میں سٹے بازی اور آن لائن جوئے کے پلیٹ فارم کو فروغ دینے پر کارروائی کے لیے درخواست دائر کی گئی ہے۔
درخواست میں مؤقف اختیار کیا گیا ہے کہ وسیم اکرم ایک بھارتی بیٹنگ ایپ کے ساتھ برانڈ ایمبیسڈر کی حیثیت سے وابستہ ہیں۔ شہری نے اپنی درخواست میں بتایا کہ سوشل میڈیا پر سامنے آنے والے ایک پوسٹر اور ویڈیو کلپ میں وسیم اکرم کو اس پلیٹ فارم کی تشہیر کرتے ہوئے دیکھا جاسکتا ہے، جس کی وجہ سے عام صارفین بھی اس ایپ میں دلچسپی لے رہے ہیں۔
مزید برآں، درخواست گزار نے 2016 کے الیکٹرانک کرائمز ایکٹ کے تحت وسیم اکرم کے خلاف سخت قانونی کارروائی کا مطالبہ کیا ہے۔
اب تک وسیم اکرم کی جانب سے اس معاملے پر کوئی ردعمل سامنے نہیں آیا۔ یاد رہے کہ اس سے قبل اسی ایپ کی پروموشن میں شامل ہونے پر معروف یوٹیوبر اور ٹک ٹاکر سعد الرحمان المعروف ڈکی بھائی کو بھی گرفتار کیا گیا تھا اور عدالت نے ان کا دو روزہ جسمانی ریمانڈ منظور کیا تھا۔