صوابی میں کلاؤڈ برسٹ کے نتیجے میں ہونے والی تباہی کے بعد ریسکیو آپریشن جاری ہے اور اب تک ملبے سے 21 نعشیں نکالی جا چکی ہیں۔ تفصیلات کے مطابق خیبر پختونخوا کے ضلع صوابی کے علاقے گدون دالواڑی میں کلاؤڈ برسٹ کے باعث بڑے پیمانے پر تباہی ہوئی، جس کے بعد ریسکیو آپریشن بدستور جاری ہے۔ اب تک نکالی جانے والی نعشوں میں چار بچے، چار خواتین اور 13 مرد شامل ہیں۔
ذرائع کے مطابق گزشتہ روز کے آپریشن میں آٹھ افراد کی لاشیں برآمد کی گئی تھیں۔ مقامی حکام کا کہنا ہے کہ ریسکیو ٹیمیں متاثرہ علاقوں میں ہر ممکن امداد فراہم کر رہی ہیں۔
ڈسٹرکٹ ایمرجنسی آفیسر اویس بابر نے بتایا کہ ریسکیو ٹیمیں امدادی کارروائیوں میں مصروف ہیں اور ہنگامی صورتحال اب بھی برقرار ہے۔ مزید افراد کے ملبے تلے دبے ہونے کی اطلاعات بھی موصول ہوئی ہیں۔ انہوں نے کہا کہ ریسکیو سرچ آپریشن بدستور جاری ہے اور انشا اللہ جلد ملبے تلے دبے تمام افراد کو ریکور کر کے آپریشن مکمل کر لیا جائے گا۔