کراچی میں حالیہ بارشوں کے باعث شہر کا گنداور کچرا سمندرمیں پہنچنے سے سمندری آلودگی میں خطرناک حد تک اضافہ ہوگیا۔
وفاقی وزیر برائے بحری امور جنید انوار چوہدری نے بندر گاہوں کی فوری صفائی مہم کی ہدایت کرتے ہوئے کہا کہ صرف صفائی نہیں بلکہ آلودگی کی روک تھام بھی ضروری ہے، بحری آلودگی کی روک تھام کے لیے میرین پولیوشن کنٹرول بورڈ فعال کر دیا گیا۔
جنید انوار چوہدری کا کہنا تھا کہ موسمیاتی تبدیلی سے مون سون بارشیں غیر یقینی ہوگئی ہیں، بارش کا گندا پانی سمندر کو آلودہ کر رہا ہے، انہوں نے کہا کہ سیوریج ٹریٹمنٹ پلانٹس کے منصوبے جلد مکمل کیے جائیں گے۔
وفاقی وزیر نے مزید کہا کہ سمندری آلودگی شہریوں اور ماحولیاتی نظام کے لیے خطرہ ہے، پلاسٹک، تیل اور کیمیائی اجزاء سمندری غذا کو آلودہ کر رہے ہیں جس کے سبب ماہی گیروں کے روزگار کو بھی شدید خطرات لاحق ہیں۔
وفاقی وزیر برائے بحری امور نے کہا ہے کہ ماحولیاتی تحفظ کے لیے صوبائی حکومت کے ساتھ مل کر کام کریں گے۔