کرناٹک کے ضلع داونگیرے کے ایک گاؤں نالور میں ایک عام گھریلو مرغی نے ایسا کام کیا جس نے سب کو چونکا دیا۔ برسوں سے سفید انڈے دینے والی یہ مرغی اچانک ایک دن نیلے رنگ کا انڈا دے گئی۔ سید نور، جو اس مرغی کے مالک ہیں، خود بھی حیرت میں پڑ گئے اور دیکھتے ہی دیکھتے یہ خبر پورے گاؤں میں پھیل گئی۔ لوگ جوق در جوق سید نور کے گھر پہنچنے لگے تاکہ اس انوکھے انڈے کو اپنی آنکھوں سے دیکھ سکیں۔
سید نور نے بتایا کہ انہوں نے یہ مرغی دو سال پہلے ایک تاجر سے خریدی تھی اور اب تک ہمیشہ سفید یا ہلکے پیلے انڈے ہی دیکھے تھے۔ ان کے مطابق ان کے پاس دس مرغیاں ہیں اور سب کی خوراک بھی بالکل عام ہے۔ اس انوکھے انڈے نے انہیں سوچنے پر مجبور کر دیا کہ آخر ایسا کیسے ممکن ہوا۔
معاملہ صرف گاؤں والوں کی دلچسپی تک محدود نہ رہا بلکہ محکمہ مویشی پالن کے حکام بھی وہاں پہنچ گئے۔ اسسٹنٹ ڈائریکٹر ڈاکٹر اشوک نے میڈیا سے گفتگو کرتے ہوئے کہا کہ مرغیاں عموماً سبز یا پیلے رنگ کے انڈے دیتی ہیں لیکن نیلے رنگ کا انڈا شاذ و نادر ہی سامنے آتا ہے۔ ان کے مطابق اس کی ایک سائنسی وجہ یہ بھی ہو سکتی ہے کہ مرغی کے جسم میں biliverdin نامی روغن موجود ہو، جو انڈے کے خول کو نیلا کر دیتا ہے۔
فی الحال یہ انڈا محفوظ کر لیا گیا ہے اور ماہرین اس غیر معمولی واقعے کی مزید جانچ کر رہے ہیں۔ گاؤں کے لوگ اسے قدرت کا ایک انوکھا کرشمہ قرار دے رہے ہیں جبکہ ماہرین اسے ایک سائنسی پہلو سے دیکھ رہے ہیں۔ اس واقعے نے بلاشبہ ایک عام سی مرغی کو غیر معمولی توجہ کا مرکز بنا دیا ہے۔