افغانستان میں طالبان حکومت کے ترجمان نے کہا ہے کہ ملک میں گزشتہ شب آنے والے زلزلے کے نتیجے میں 800 سے زیادہ افراد ہلاک اور 2500 زخمی ہوگئے ہیں۔
پیر کو کابل میں پریس کانفرنس کرتے ہوئے طالبان حکومت کے ترجمان ذبیح اللہ مجاہد نے کہا کہ ’کنڑ میں 800 افراد ہلاک اور 2500 زخمی ہیں جبکہ ننگرہار میں بھی زلزلے سے 12 افراد ہلاک اور 255 زخمی ہوئے۔‘
زلزلے کے نیتجے میں سینکڑوں مکانات تباہ ہو گئے۔
وزرات داخلہ کے ترجمان عبدالمتین قانی کے مطابق ریکٹر سکیل پر زلزلے کی شدت چھ تھی۔
نیوز چینل طلوع کی رپورٹ میں امریکی جیولوجیکل سروے کا حوالہ دیتے ہوئے بتایا گیا ہے کہ اتوار اور پیر کی درمیانی رات مختلف ممالک میں آنے والے زلزلے کا مرکز کنڑ صوبے میں تھا۔
قدرتی آفات سے نمٹنے والے ادارے کے حکام کا کہنا ہے کہ زلزلے سے کنڑ، نرگال، ساؤکے، وتاپور، منگوئی اور چاپا دارا کے علاقوں میں ہلاکتیں ہوئیں اور مقامی لوگ زخمی ہوئے۔
حکام نے خدشہ ظاہر کیا ہے کہ مرنے اور زخمی ہونے والوں کی تعداد میں اضافہ ہو سکتا ہے اور اس وقت بھی مختلف علاقوں میں امدادی سرگرمیاں جاری ہیں اور ملبے تلے دبنے والے لوگوں کو تلاش کیا جا رہا ہے۔
رپورٹ کے مطابق حکام کا کہنا ہے کہ ضلع نرگول کے مختلف دیہات میں اب بھی لوگ ملبے نیچے دبے ہوئے ہیں جن کے بارے میں حکام کا اندازہ ہے کہ یہ تعداد 100 سے زائد ہو سکتی ہے۔
متعدد مکانات گرنے سے مقامی افراد زخمی ہیں۔ (فوٹو: اے ایف پی)
ان علاقوں کے رہائشیوں کی جانب سے دوسرے علاقوں کے مکینوں سے اپیل کی گئی ہے کہ ان کی مدد کے پہنچیں۔
رپورٹ کے مطابق وزارت دفاع، داخلہ اور صحت کی وزارتوں کی امدادی ٹیمیں علاقوں میں پہنچ چکی ہیں اور زخمیوں کو ہوائی جہاز کے ذریعے ننگرہار کے ہسپتال میں پہنچایا جا رہا ہے۔
افغانستان حکومت کے ترجمان ذبیح اللہ مجاہد نے رات کو زلزلے کے بعد جاری کیے گئے بیان میں کہا تھا کہ لوگوں کو بچانے کے لیے تمام وسائل بروئے کار لائے جا رہے ہیں۔
رات ساڑھے 12 بجے کے قریب ملک میں زلزلے کے شدید جھٹکے محسوس کیے گئے جن کی شدت ریکٹر سکیل پر چھ تھی، اس کے پانچ اعشاریہ دو کے آفٹر شاکس آئے جبکہ کچھ دیر بعد چار اعشاریہ سات شدت کے جھٹکے بھی محسوس کیے گئے۔
ایئر ایمبولینس کے ذریعے بھی زخمیوں کو ہسپتال پہنچایا گیا۔ (فوٹو: روئٹرز)
یہ جھٹکے کنڑ کے علاوہ ننگرہار اور لغمان میں بھی محسوس کیے گئے جبکہ ان کا دائرہ کابل تک پہنچنے کے علاوہ پاکستان کے صوبے خیبر پختونخوا تک بھی پہنچا۔
قبل ازیں اتوار اور پیر کی درمیانی شب پاکستانی حکام کی جانب سے بھی بتایا گیا تھا کہ اسلام آباد سمیت مختلف شہروں میں زلزلے کے شدید جھٹکے محسوس کیے گئے جن میں مری، پشاور، مردان، صوابی سمیت دوسرے شہر شامل تھے۔
اسلام آباد میں زلزلہ تقریباً 10 سیکنڈ تک جاری رہا جس کے باعث شہری گھروں سے باہر نکل آئے اور لوگوں میں خوف و ہراس پھیل گیا۔
افغان حکام کا کہنا ہے کہ زلزلے سے سینکڑوں مکانات تباہ ہو گئے ہیں (فوٹو: طالبان حکومت)
’ہر ممکن تعاون کے لیے تیار ہیں‘، وزیراعظم کا افغانستان سے اظہار افسوس
پاکستان کے وزیراعطم شہباز شریف نے افغانستان میں زلزلے سے جانی نقصان پر افسوس کا اظہار کیا ہے۔
پیر کو انہوں نے ایکس پر ایک بیان میں لکھا کہ افغانستان میں زلزلے سے سینکڑوں کی تعداد میں افراد کی ہلاکت اور کئی دیہات تباہ ہونے کی اطلاعات ہیں، جس پر میں اپنی، حکومت اور پاکستان کے عوام کی جانب سے دکھ کا اظہار کرتا ہوں۔
ان کا مزید کہنا تھا کہ ’میں غمزدہ خاندانوں سے تعزیت کرتا ہوں، ہم دکھ کی اس گھڑی میں اپنے افغان بہن بھائیوں کے ساتھ کھڑے ہیں اور ہر ممکن تعاون کے لیے تیار ہیں۔‘