وزیراعلیٰ بلوچستان میر سرفراز بگٹی نے سریاب روڈ دھماکے کی شدید مذمت کرتے ہوئے کہا کہ دہشتگرد معصوم شہریوں کو نشانہ بنا رہے ہیں جن کا نہ کوئی قبیلہ ہے اور نہ ہی کوئی قوم، ان کا واحد مقصد خون خرابہ ہے۔ انہوں نے کہا کہ دھماکے میں جاں بحق افراد کے لواحقین کو معاوضہ فراہم کیا جا رہا ہے۔
اپنی گفتگو میں وزیراعلیٰ نے کہا کہ جمہوری انداز میں احتجاج ہر جماعت کا حق ہے، لیکن تشدد کسی صورت برداشت نہیں کیا جائے گا۔ انہوں نے واضح کیا کہ انہوں نے سردار اختر مینگل پر حملے سے متعلق کوئی بیان نہیں دیا، تاہم اپوزیشن لیڈر یونس زہری کے ساتھ سیاسی قیادت کو درپیش خطرات پر بات چیت کی ہے۔
ان کا کہنا تھا کہ دہشتگرد انٹرنیٹ سروس استعمال کرتے ہیں، اسی لیے حفاظتی اقدامات کے تحت کبھی کبھار سروس بند کرنا ضروری ہوجاتا ہے۔ انہوں نے اعلان کیا کہ اب تمام سیاسی جماعتوں کو اپنے جلسے مغرب تک ختم کرنا ہوں گے۔
وزیراعلیٰ نے بتایا کہ زیارت میں قبائلی جھگڑا ختم کرنے کے لیے جرگہ بلایا جا رہا ہے جبکہ دریائے سندھ میں پانی کی صورتحال پر بھی مسلسل نظر رکھی جا رہی ہے، اور اس وقت بلوچستان کو کسی قسم کے سیلاب کا خطرہ نہیں ہے۔
وزیراعلیٰ سرفراز بگٹی نے وزیراعظم پاکستان کے دورۂ چین کو کامیاب قرار دیتے ہوئے کہا کہ جو لوگ کہتے تھے پاکستان دنیا میں تنہائی کا شکار ہے، وہ مایوس ہوئے ہیں۔ ان کا مزید کہنا تھا کہ تاریخ گواہ ہے کہ دنیا ہمیشہ فاتح کے ساتھ کھڑی ہوتی ہے۔