سینیٹر فیصل واوڈا نے ٹیکس چوری کرنے والوں کو خبردار کرتے ہوئے کہا ہے کہ بڑا کریک ڈاؤن شروع ہونے والا ہے لگژری لائف اسٹائل اور گوشواروں کے فرق پر سخت کارروائی ہوگی۔
سماجی رابطے کی ویب سائٹ ایکس پر جاری بیان میں فیصل واوڈا نے کہا کہ انکم ٹیکس گوشواروں کی آخری تاریخ تک اگر پچھلے سال کے مقابلے میں ٹیکس کی شرح میں کم از کم 15 فیصد اضافہ نہ ہوا تو پچھلے سالوں کے تمام گوشوارے کھول دیے جائیں گے۔ انہوں نے واضح کیا کہ 30 فیصد ٹیکس دینے والے بھی ایف بی آر کی کارروائی سے نہیں بچ سکیں گے۔
سینیٹر فیصل واوڈا کے مطابق سوشل میڈیا پر لگژری لائف اسٹائل اور گوشواروں کے فرق کی لسٹیں تیار کر لی گئی ہیں۔ اب ٹیکس دہندگان کو اپنی پوزیشن واضح کرنی ہوگی بصورت دیگر سخت کارروائی ہوگی۔
انہوں نے مزید بتایا کہ ٹیکس چوری کرنے والے افراد اور کمپنیوں کی نشاندہی کرنے والوں کو بڑے انعامات دیے جائیں گے جبکہ وسل بلورز کی معلومات کو مکمل طور پر صیغہ راز میں رکھا جائے گا۔
فیصل واوڈا نے کہا کہ ایف بی آر اپنے قوانین کے تحت کارروائی کرنے کا مجاز ہے اور ٹیکس نہ دینے والوں کے لیے کوئی گنجائش نہیں ہوگی۔ انہوں نے تنبیہ کی سخت کریک ڈاؤن کی تیاری ہے پھر کہنا مت کہ اطلاع نہیں دی۔