وفاقی وزیر داخلہ محسن نقوی نے اسلام آباد پریس کلب میں صحافیوں پر پیش آنے والے ناخوشگوار واقعے کا سخت نوٹس لیتے ہوئے آئی جی اسلام آباد پولیس سے فوری رپورٹ طلب کرلی۔
وزیر داخلہ نے واقعے کی شفاف تحقیقات کا حکم دیتے ہوئے کہا کہ صحافی برادری پر تشدد کسی صورت برداشت نہیں کیا جائے گا۔ انہوں نے ہدایت دی کہ واقعے میں ملوث اہلکاروں کا تعین کرکے ان کے خلاف انضباطی کارروائی عمل میں لائی جائے۔
محسن نقوی نے واضح کیا کہ آزادی صحافت اور صحافیوں کا احترام حکومت کی اولین ترجیح ہے اور ایسے واقعات ناقابلِ قبول ہیں۔