اسلام آباد: محکمہ موسمیات نے بتایا ہے کہ موسم سرما کا بگل بج چکا ہے اور آئندہ چند روز کے دوران ملک کے مختلف حصوں میں بارشوں کا نیا سلسلہ شروع ہونے جا رہا ہے۔
محکمہ موسمیات کے مطابق 4 سے 6 اکتوبر کے دوران ملک کے بالائی اور وسطی علاقوں میں گرج چمک کے ساتھ بارش، ژالہ باری اور تیز آندھی کی پیش گوئی کی گئی ہے۔
ترجمان محکمہ موسمیات نے کہا ہے کہ آج رات سے 7 اکتوبر تک پنجاب، خیبر پختونخوا، کشمیر، گلگت بلتستان اور اسلام آباد سمیت بالائی اور وسطی علاقوں میں مختلف اوقات میں آندھی، جھکڑ اور بارش کا امکان ہے۔ بعض مقامات پر ژالہ باری بھی ہوسکتی ہے جس سے فصلوں کو نقصان پہنچنے کا خدشہ ہے۔
محکمہ موسمیات نے کاشتکاروں کو مشورہ دیا ہے کہ وہ اپنی فصلوں اور تیار شدہ اجناس کو محفوظ بنائیں جبکہ شہریوں کو ہدایت کی گئی ہے کہ آندھی اور بارش کے دوران غیر ضروری سفر سے گریز کریں۔ مزید برآں نشیبی علاقوں میں بارش کے باعث پانی جمع ہونے کے امکانات کو بھی نظرانداز نہ کیا جائے۔
محکمہ موسمیات کے مطابق یہ بارشیں نہ صرف موسم میں خوشگوار تبدیلی لائیں گی بلکہ درجہ حرارت میں بھی نمایاں کمی واقع ہوگی جس کے بعد ملک کے بیشتر حصوں میں موسم سرما باضابطہ طور پر شروع ہوجائے گا۔