چین میں ایک انوکھا واقعہ پیش آیا جہاں ایک خاتون نے اپنے سابق منگیتر سے گلے ملنے کی فیس کا مطالبہ کیا ہے۔ ساؤتھ چائنہ مارننگ پوسٹ کے مطابق ہینان صوبے کی خاتون نے اپنے منگیتر کے خاندان سے دو لاکھ یوآن (چینی کرنسی) کا منگنی کا تحفہ لیا تھا تاہم بعد میں انہوں نے شادی نہ کرنے کا فیصلہ کیا۔اس کے بعد خاتون نے جو کیا وہ چینی سوشل میڈیا پلیٹ فارمز پر وائرل ہو گیا ہے۔ خاتون نے مرد کو ایک لاکھ 79 ہزار یوآن واپس کرنے پر رضامندی ظاہر کی۔ تاہم وہ ’گلے لگانے کی فیس‘ کے طور پر 30 ہزار یوآن کاٹنا چاہتی تھیں۔ اس رقم میں کچھ دوسرے اخراجات بھی شامل تھے۔مبینہ طور پر خاتون نے سابق منگیتر سے گزشتہ سال شادی کرانے والے میچ میکر کے ذریعے ملاقات کی تھی۔ وہ دونوں ہینان صوبے کے پنگڈنگشن علاقے میں رہتے تھے۔ رواں جنوری میں ان کی منگنی کے بعد شادی نومبر میں طے کی گئی تھی۔بتایا گیا ہے کہ شادی کے لیے ہوٹل بھی بک کر لیا گیا تھا اور دعوت نامہ بھی بھیج دیا گیا تھا لیکن تقریب سے چند ہفتے قبل خاتون نے یہ کہتے ہوئے اپنی شادی منسوخ کرنے کا فیصلہ کیا کہ وہ اس شخص کی اہلیہ نہیں بننا چاہتیں۔یہ واقعہ سوشل میڈیا پر وائرل ہوا جس پر چین بھر میں 23 ملین افراد نے تبصرے کیے۔اُن کے وان نامی میچ میکر نے میڈیا کو بتایا کہ ’خاتون کا خیال ہے کہ یہ بہت زیادہ دیانتدار شخص ہے اور اس کی آمدنی بہت کم ہے۔‘انہوں نے بتایا کہ ’جہاں تک دُلہن کو دی گئی رقم کی بات ہے تو وہ واپس کرنے کو تیار ہیں مگر اُس میں سے 30 ہزار یوآن خاتون ’گلے لگنے کی فیس‘ کے طور پر اپنے پاس رکھنا چاہتی ہیں۔‘وان نے کہا کہ ’میں نے پچھلی دہائی میں 1,000 جوڑوں کو متعارف کرایا ہے۔ اس خاتون کا خاندان سب سے زیادہ مشکل تھا جن کا میں نے سامنا کیا۔ لیکن 30,000 یوآن کاٹنے کا اس کا مطالبہ غیراخلاقی ہے۔‘
واقعہ سوشل میڈیا پر وائرل ہوا جس پر چین بھر میں 23 ملین افراد نے تبصرے کیے۔ فائل فوٹو: اے ایف پی
رپورٹ کے مطابق منگنی کے فوٹو شوٹ کے دوران فوٹوگرافر کے کہنے پر خاتون نے منگیتر کو گلے لگایا تھا۔
آخر میں دونوں خاندانوں نے اس بات پر اتفاق کیا کہ خاتون سابق منگیتر کو ایک لاکھ 70 ہزار یوآن واپس کرے گی۔شادی کا تحفہ، جسے دلہن کی قیمت بھی کہا جاتا ہے، چین میں ایک عام رواج ہے جہاں دولہا کا خاندان دلہن کے خاندان کو رقم ادا کرتا ہے اور ایسے بہت سے واقعات ہوتے ہیں جب خواتین شادی کی منسوخی کے بعد لی گئی رقم واپس کرنے سے انکار کر دیتی ہیں۔چین کی سپریم پیپلز کورٹ نے اس معاملے کی تشریح کرتے ہوئے شادی توڑنے پر یہ رقم یا تحائف واپس کرنے کا کہا ہے۔