خیبرپختونخوا ہیلتھ کیئر کمیشن نے گزشتہ تین ماہ کی کارکردگی رپورٹ جاری کر دی جس کے مطابق صوبے بھر میں 801 طبی مراکز رجسٹر کیے گئے جبکہ 1,678 مراکز کو مختلف خلاف ورزیوں پر سیل کر دیا گیا۔
ترجمان ہیلتھ کیئر کمیشن کے مطابق تین ماہ کے دوران 8,199 طبی مراکز کا معائنہ کیا گیا جن میں سے 4,496 مراکز کو نوٹسز جاری کیے گئے۔ مزید برآں 74 مراکز کی تفصیلی جانچ پڑتال کی گئی جن میں سے 17 کو مکمل اور 136 کو عبوری لائسنس جاری کیے گئے۔
رپورٹ کے مطابق خدماتِ صحت کے معیار کو بہتر بنانے کے لیے سات تربیتی سیشنز کا انعقاد بھی کیا گیا، جن میں صوبے کے مختلف اضلاع سے تعلق رکھنے والے 183 طبی عملے کو تربیت فراہم کی گئی۔
ہیلتھ کیئر کمیشن کو اس عرصے میں 333 نئی شکایات موصول ہوئیں جن میں سے 303 شکایات نمٹا دی گئیں۔ڈائریکٹر آپریشنز ارسلان احمد خان نے رپورٹ پر اطمینان کا اظہار کرتے ہوئے کہا کہ یہ اعداد و شمار کمیشن کے عملے کی محنت اور عزم کا ثبوت ہیں، جن کا مقصد صوبے بھر میں عوام کو صحت کی معیاری سہولیات فراہم کرنا ہے۔