شہر قائد میں ای ٹریکس نظام کے تحت ای چالان کے عمل کو مزید مؤثر بنانے کے لیے کراچی ٹریفک پولیس نے روبوٹس متعارف کرانے کا فیصلہ کیا ہے۔
ڈی آئی جی ٹریفک پیر محمد شاہ نے ایک تقریب سے خطاب کرتے ہوئے بتایا کہ شہر میں ای چالان کے لیے تیسرا طریقہ روبوٹس کے ذریعے متعارف کرایا جا رہا ہے۔ ان کا کہنا تھا کہ آئندہ ماہ سے مختلف سڑکوں پر نو پارکنگ اور نو ٹو لین کے بورڈز نصب کیے جائیں گے اور صدر اور طارق روڈ سمیت دیگر اہم سڑکوں پر روبوٹس چلائے جائیں گے۔
ذرائع کے مطابق یہ روبوٹس 20 کلومیٹر فی گھنٹہ کی رفتار سے گاڑیوں کو اسکین کریں گے اور جو بھی گاڑی پارکنگ یا ٹریفک قوانین کی خلاف ورزی کرے گی اسے فوری ای چالان موصول ہو جائے گا۔
ڈی آئی جی نے مزید کہا کہ کراچی میں ٹریک سسٹم کے تحت صرف دو ہفتوں کے دوران ٹریفک قوانین کی خلاف ورزی پر تقریباً 50 ہزار شہریوں کے چالان جاری کیے جا چکے ہیں۔ روبوٹس کی تعیناتی کے بعد یہ عمل مزید تیز اور مؤثر ہو جائے گآ جس سے شہر میں ٹریفک نظم و ضبط بہتر بنانے میں مدد ملے گی۔