وزیراعلیٰ پنجاب نے آئندہ مالی سال کا بجٹ 16 جون کو پنجاب اسمبلی میں پیش کرنے کی منظوری دے دی ہے، جس کے بعد بجٹ اجلاس کے انعقاد کے لیے انتظامی اقدامات تیز کر دیے گئے ہیں۔
اس سلسلے میں محکمہ خزانہ نے محکمہ قانون کو پنجاب اسمبلی کا بجٹ سیشن 16 جون کو طلب کرنے کے لیے باضابطہ مراسلہ ارسال کردیا ہے۔ ذرائع کے مطابق محکمہ قانون اسمبلی کا اجلاس بلانے کی سفارش گورنر پنجاب کو بھیجے گا، جس کے بعد سیشن طلب کرنے کا باضابطہ اعلان کیا جائے گا۔
دوسری جانب صوبائی کابینہ کا اہم بجٹ اجلاس بھی کل طلب کرلیا گیا ہے، جس میں آئندہ مالی سال کے بجٹ کی منظوری دی جائے گی۔ کابینہ سے منظوری ملنے کے بعد بجٹ دستاویزات پنجاب اسمبلی میں پیش کی جائیں گی۔
حکومتی ذرائع کا کہنا ہے کہ بجٹ میں ترقیاتی منصوبوں، عوامی فلاح و بہبود اور معاشی استحکام کے لیے مختلف اقدامات اور تجاویز شامل کیے جانے کا امکان ہے۔