وفاقی حکومت نے گوادر سے عمان تک براہِ راست فیری سروس کے آغاز کی باضابطہ منظوری دے دی ہے جسے دونوں ممالک کے درمیان تجارت، سرمایہ کاری اور سفری سہولتوں کے فروغ کے لیے اہم پیش رفت قرار دیا جا رہا ہے۔
وفاقی وزیر برائے بحری امور محمد جنید انوار چوہدری کے مطابق وفاقی کابینہ نے فیری سروس کی منظوری دیتے ہوئے پاکستان اور عمان کے درمیان فیری لنک کے قیام کے لیے مفاہمت نامہ پر دستخط کی اجازت دے دی ہے۔ انہوں نے بتایا کہ اس سلسلے میں ایک اعلیٰ سطح کا عمانی وفد جلد پاکستان کا دورہ کرے گا، جو سروس کے آغاز کے لیے انتظامات کو حتمی شکل دے گا۔
وزیر نے کہا کہ گوادر، عمان فیری سروس سے دونوں ممالک کے درمیان تجارتی حجم میں نمایاں اضافہ ہوگا اور سرمایہ کاری کے نئے مواقع پیدا ہوں گے۔ اس روٹ سے پاکستانی تارکین وطن کے لیے سفر آسان اور کم لاگت ہوجائے گا، جبکہ سیاحت، ثقافت اور عوامی روابط کو بھی تقویت ملے گی۔
ان کا کہنا تھا کہ اس نئی سمندری راہداری سے خطے کے دیگر ممالک کو بھی وسط ایشیا کی منڈیوں تک بہتر رسائی حاصل ہوگی۔ انہوں نے توقع ظاہر کی کہ فیری سروس کے آغاز سے گوادر بندرگاہ میں اقتصادی سرگرمیوں کو نئی رفتار ملے گی اور بندرگاہ علاقائی تجارت کے نئے مرکز کے طور پر اُبھرے گی۔
وفاقی وزیر نے امید ظاہر کی کہ منصوبے کی تکمیل سے پاکستان اور عمان کے درمیان معاشی تعاون مزید مضبوط ہوگا اور دوطرفہ تعلقات ایک نئے مرحلے میں داخل ہوں گے۔