دفتر خارجہ نے کہا ہے کہ امریکا میں فائرنگ کا حالیہ واقعہ دہشت گردی کی عالمی سطح پر واپسی کو ظاہر کرتا ہے اور پاکستان اس واقعے کی سخت مذمت کرتا ہے۔
ترجمان نے کہا کہ واشنگٹن واقعہ عالمی برادری کے لیے انتباہ ہے کہ افغان دہشت گردی کو روکنے کے لیے فوری اقدامات کیے جائیں۔ انہوں نے تاجکستان میں ڈرون حملے میں تین چینی باشندوں کی ہلاکت پر بھی افسوس کا اظہار کیا اور کہا کہ افغانستان اپنی سرزمین سے دہشت گردی کو روکنے کا ذمہ دار ہے۔
دفتر خارجہ نے سندھ سے متعلق بھارتی وزیر دفاع راج ناتھ کے بیان کی بھی مذمت کی اور کہا کہ یہ بیان سرحدوں کے عالمی قوانین کی کھلی خلاف ورزی ہے اور بھارتی بیانات خام خیال پر مبنی ہیں۔ ترجمان نے کہا کہ پاکستان مسائل کے پر امن حل کا حامی ہے اور اپنے دفاع پر کسی بھی قسم کا سمجھوتہ نہیں کرے گا۔
مزید برآں ترجمان نے کہا کہ پاکستان اور ایران کے درمیان پاکستان-ایران گیس پائپ لائن پر مشاورت جاری ہے اور دونوں ممالک مل کر اس مسئلے کا حل نکالیں گے۔