پاکستان کے ابھرتے ہوئے نوجوان اوپنر سمیر منہاس نے آج شاندار بیٹنگ کرتے ہوئے بھارت کے خلاف ایشیا کپ انڈر 19 کے فائنل میں سنچری داغ دی جس سے پاکستان کو بہت ہی مضبوط بنیاد مل گیا ہے۔
سمیر منہاس نے 71 بالز پر اپنی سنچری مکمل کی جس میں 12 چوکے اور چار چھکے شامل ہیں۔ وہ اب بھی فیس پر موجود ہیں اور 76 گیندوں پر 111 رنز کر چکے ہیں۔ یہ سمیر کی ٹورنامنٹ کی دوسری سنچری ہے، انہوں نے پہلے میچ میں ہی ملائیشیا کے خلاف 177 رنز کیے تھے۔
سیمی فائنل میں بھی بنگلا دیش کے خلاف انہوں نے 69 ناٹ آؤٹ کر کے اپنی ٹیم کو فائنل میں پہنچا دیا۔ سمیر جن کا تعلق ملتان سے ہے ایک اور ابھرتے ہوئے کرکٹر عرفات منہاس کے چھوٹے بھائی ہیں۔ عرفات 2024 کے یوتھ ورلڈ کپ میں پاکستان کی نمائندگی کر چکے ہیں۔
پاکستان نے سمیر کی شاندار سنچری کی بدولت 30 اوور میں دو وکٹوں کے نقصان پر 207 رنز کرلیے ہیں۔ بھارت نے ٹاس جیت کر فائنل میں پاکستان کو پہلے بیٹنگ کی دعوت دی۔