امریکا کے مصروف ترین ایئرپورٹس میں سے ایک پر ایک غیر معمولی واقعہ اس وقت پیش آیا جب ایک مسافر نے ٹیک ووے کے دوران اچانک طیارے کا ایمرجنسی دروازہ کھول دیا۔ اس واقعے نے نہ صرف پرواز کو روک دیا بلکہ پورے عملے اور مسافروں کو شدید تشویش میں بھی مبتلا کر دیا۔
اٹلانٹا انٹرنیشنل ایئرپورٹ سے ایمسٹرڈیم روانہ ہونے والی کے ایل ایم فلائٹ میں 48 سالہ جوہانسن وان ہیرٹم نامی مسافر نے اُس وقت دروازہ کھولا جب طیارہ رن وے کی جانب بڑھ رہا تھا۔ دروازہ کھلتے ہی پرواز کو فوری طور پر واپس گیٹ کی طرف موڑ دیا گیا، جہاں سیکیورٹی ٹیم نے صورتحال کو قابو کیا۔
پولیس کے مطابق ملزم نے دعویٰ کیا کہ اس نے جہاز میں ایک مسافر کو ہتھیار کے ساتھ دیکھا، جس سے وہ خوفزدہ ہو کر باہر نکلنے کی کوشش کرنے لگا۔ تاہم حکام کو اس دعوے کی کوئی تصدیق نہیں ملی، اور ابتدائی تاثر یہی ہے کہ وان ہیرٹم ذہنی دباؤ کا شکار تھا، جس کے باعث اس نے یہ انتہائی قدم اٹھایا۔
طیارہ جیسے ہی ایک ایگزٹ ریمپ کے ذریعے واپس لایا گیا، پولیس نے جہاز میں داخل ہو کر مسافر کو حراست میں لے لیا۔ واقعے کے بعد اسے کئی سنگین الزامات کا سامنا ہے جن میں غفلت، ہوائی جہاز کو نقصان پہنچانا اور سیکیورٹی پروٹوکول میں رکاوٹ ڈالنا شامل ہیں۔
یہ واقعہ ایک بار پھر اس بات کی نشاندہی کرتا ہے کہ ایئرپورٹس پر ذہنی صحت کے مسائل سے نمٹنے اور سیکیورٹی کے اقدامات پر بھرپور توجہ دینا کیوں ضروری ہے، کیونکہ ایک لمحے کی بے چینی پورے نظام کو متاثر کر سکتی ہے۔