پنجاب میں منشیات مافیا کے خلاف تاریخ کی سب سے بڑی کارروائی شروع ہونے جارہی ہے، جس نے صوبے بھر میں ہلچل مچا دی ہے۔
منشیات فروشوں کے خلاف اس غیر معمولی مہم کا اعلان کمانڈر کاؤنٹر کرائم ڈویژن (CCD) سہیل ظفر چٹھہ نے کیا، جن کے مطابق صرف 72 گھنٹوں کے اندر پنجاب کو منشیات سے پاک کرنے کا ہدف مقرر کیا گیا ہے۔
سہیل ظفر چٹھہ نے واضح کیا کہ اس آپریشن میں کسی قسم کی سفارش، سیاسی دباؤ یا اثر و رسوخ برداشت نہیں کیا جائے گا بلکہ سفارش کرنے والے افراد کے خلاف بھی سخت کارروائی عمل میں لائی جائے گی۔
ذرائع کے مطابق پنجاب بھر میں منشیات فروشوں، سپلائرز اور بڑے نیٹ ورکس کی مکمل فہرستیں تیار کرلی گئی ہیں، پولیس اور خصوصی ٹیمیں ہائی الرٹ ہیں، ہر ضلع میں ٹارگٹڈ چھاپہ مار کارروائی کرکے بڑے پیمانے پر گرفتاریاں کرتے ہوئے سپلائی چین اور نیٹ ورکس کا مکمل خاتمہ کیا جائے گا۔
حکام کے مطابق تعلیمی اداروں کے اندر اور اطراف موجود منشیات فروش نیٹ ورکس کو خصوصی ٹارگٹ لسٹ میں شامل کیا گیا ہے تاکہ نوجوان نسل کو نشے کی تباہی سے محفوظ رکھا جاسکے۔
سہیل ظفر چٹھہ نے اسے پنجاب کی تاریخ کی تیز ترین اور طاقتور ترین کارروائی قرار دیتے ہوئے کہا کہ اس مہم کا واحد مقصد نوجوانوں کو منشیات کی لعنت سے نجات دلانا ہے۔