نائب وزیراعظم پاکستان اسحاق ڈار نے کہا ہے کہ پاکستان غزہ میں مجوزہ امن فورس کے تحت اپنی فوج بھیجنے کے لیے تیار ہے، تاہم اس سے پہلے فورس کے ٹی آرز، مینڈیٹ اور کردار واضح ہونا ضروری ہے۔ انہوں نے واضح کیا کہ پاکستان کسی ایسی کوشش کا حصہ نہیں بنے گا جس کا مقصد حماس کو کمزور کرنا ہو۔
اسحاق ڈار نے اپنے بیان میں کہا کہ حماس کو غیر مسلح کرنا پاکستان کی ذمہ داری نہیں، یہ معاملہ فلسطینی اتھارٹی اور ان کے قانون نافذ کرنے والے اداروں کے دائرہ کار میں آتا ہے۔ پاکستان کا کردار صرف امن اور انسانی تحفظ یقینی بنانے تک محدود ہوگا۔
نائب وزیراعظم نے مزید کہا کہ غزہ میں قیامِ امن اور انسانی بحران کے خاتمے کے لیے پاکستان ہمیشہ فلسطینی عوام کے ساتھ کھڑا ہے اور کسی بھی بین الاقوامی پلیٹ فارم پر تعمیری کردار ادا کرنے کو تیار ہے۔
انہوں نے عالمی برادری پر زور دیا کہ غزہ میں جنگ بندی، امداد کی فراہمی اور فلسطینی شہریوں کے تحفظ کے لیے فوری اور موثر اقدامات کیے جائیں۔