وزیر دفاع خواجہ آصف نے چیف آف ڈیفنس فورسز کی تقرری سے متعلق گردش کرنے والی قیاس آرائیوں کو مسترد کرتے ہوئے واضح کیا ہے کہ نوٹیفکیشن اپنے مقررہ وقت پر ہی جاری کیا جائے گا۔
انہوں نے بتایا کہ سی ڈی ایف کی تقرری سے متعلق باضابطہ پروسس کا آغاز کر دیا گیا ہے، جس میں تمام آئینی و قانونی تقاضوں کو مدِنظر رکھا جا رہا ہے۔
خواجہ آصف کا کہنا تھا کہ بعض حلقوں کی جانب سے غیر ضروری انداز میں افواہیں پھیلائی جا رہی ہیں، جن کا حقیقت سے کوئی تعلق نہیں۔ انہوں نے مزید کہا کہ حکومت اہم قومی عہدوں پر تقرریوں کے حوالے سے مکمل سنجیدگی اور ذمہ داری کے ساتھ فیصلے کر رہی ہے۔
وزیر دفاع نے یہ بھی بتایا کہ وزیراعظم شہباز شریف کچھ دیر میں بیرونِ ملک دورہ مکمل کرنے کے بعد وطن واپس پہنچ رہے ہیں، جس کے بعد تقرری کے عمل میں مزید پیش رفت متوقع ہے۔
حکومتی ذرائع کے مطابق، چیف آف ڈیفنس فورسز کی تقرری کا عمل جاری ہے اور نوٹیفکیشن مناسب وقت پر جاری کر دیا جائے گا۔