کیماڑی سے منوڑہ جانے والی دو کشتیوں میں تصادم کے نتیجے میں ایک مسافر لانچ ڈوب گئی، حادثے میں ایک خاتون جاں بحق جبکہ دیگر کی حالت غیر ہے۔
پولیس کے مطابق حادثہ کیماڑی گیٹ نمبر1 جیٹی پر پیش آیا، دو لانچوں میں تصادم کے بعد مسافروں سے بھری ایک لانچ ڈوبنے کی اطلاع ملتے ہی ایدھی بحری خدمات کی ٹیم کو طلب کیا گیا، غوطہ خوروں نے ایک خاتون کی لاش جبکہ 7 افراد کو نیم بے ہوشی کی حالت میں سمندر سے نکال لیا، جن میں خواتین اور بچے شامل ہیں۔
بتایا جاتا ہے کہ کیماڑی منوڑہ سے بابا بھٹ جانے والی دو کشتیوں میں 20 سے 25 مسافر موجود تھے۔
ایس ایس پی کیماڑی امجد شیخ کے مطابق تمام افراد کو ریسکیو کرلیا گیا ہے، 10 سے 12 زخمیوں کو نجی اسپتال منتقل کردیا گیا ہے، جن میں دو بچوں کی حالت تشویشناک بتائی جاتی ہے۔
کیماڑی پولیس کی اضافی نفری اور ریسکیو کے غوطہ خوروں کی ٹیم جائے وقوعہ پر موجود ہے، اور مزید حفاظتی اقدامات کیے جا رہے ہیں۔