امریکا نے سفری پابندیوں کی فہرست میں شامل ممالک کی تعداد 19 سے بڑھا کر 30 سے زائد کرنے کی تیاری شروع کر دی ہے۔ امریکی ہوم لینڈ سیکیورٹی کی سیکرٹری کرسٹی نائم کے مطابق صدر ڈونلڈ ٹرمپ اس بات کا جائزہ لے رہے ہیں کہ مزید کن ممالک پر سفری پابندیاں عائد کی جائیں۔
رواں ماہ کے آغاز میں ٹرمپ انتظامیہ نے قومی سلامتی اور عوامی تحفظ کے خدشات کی بنیاد پر 19 غیر یورپی ممالک سے آنے والے تارکینِ وطن کی تمام امیگریشن درخواستیں روک دی تھیں، جن میں گرین کارڈ اور امریکی شہریت کی درخواستیں بھی شامل تھیں۔
رائٹرز کے مطابق یہ پابندیاں ان 19 ممالک کے شہریوں پر لاگو ہیں جن پر جون میں بھی سفری پابندیوں کا نفاذ کیا گیا تھا۔ ان میں ممالک افغانستان، برما، چاڈ، جمہوریہ کانگو، استوائی گنی، اریٹریا، ہیٹی، ایران، لیبیا، صومالیہ، سوڈان اور یمن شامل ہیں۔
ان ممالک پر سخت ترین پابندیاں عائد تھیں جس میں چند استثناؤں کے ساتھ امریکا میں داخلے پر مکمل پابندی بھی شامل تھی جبکہ جزوی پابندیوں کا سامنا کرنے والے ممالک میں برونڈی، کیوبا، لاؤس، سیرالیون، ٹوگو، ترکمانستان اور وینیزویلا شامل ہیں۔
امریکی حکام کے مطابق مزید ممالک کا جائزہ لیا جا رہا ہے اور فہرست میں اضافہ متوقع ہے۔امریکا کے اس فیصلے کے بعد سفری پابندیوں کا دائرہ کار عالمی سطح پر مزید وسیع ہونے کا امکان ظاہر کیا جا رہا ہے۔