خیبر پختونخوا میں رواں سال ڈرون حملوں سے متعلق اہم تفصیلات سامنے آئی ہیں۔
پولیس دستاویزات کے مطابق صوبے کے مختلف اضلاع میں مجموعی طور پر 65 ڈرون حملے ریکارڈ کیے گئے۔ دستاویزات کے مطابق نارتھ وزیرستان میں سب سے زیادہ 31 ڈرون حملے ہوئے، جبکہ بنوں میں 23 حملے رپورٹ ہوئے۔
اسی طرح باجوڑ میں 5، ساوتھ وزیرستان میں 3 اور ٹانک میں ایک ڈرون حملہ ہوا۔ پولیس ریکارڈ کے مطابق بنوں میں نصب اینٹی ڈرون نظام کے باعث 300 سے زائد ڈرون حملوں کو ناکام بنایا گیا۔
حکام کے مطابق یہ سیکیورٹی اداروں کی بروقت کارروائی کا نتیجہ ہے۔ تاہم ڈرون حملوں کے باعث بنوں میں 9 شہری جاں بحق اور 33 افراد زخمی ہوئے، جبکہ ان واقعات میں 19 پولیس اہلکار بھی زخمی ہوئے ہیں۔
سیکیورٹی ذرائع کا کہنا ہے کہ ڈرون حملوں میں اضافے سے شہریوں اور قانون نافذ کرنے والے اداروں کو سنگین خطرات لاحق ہیں، جس کے پیش نظر حساس اضلاع میں سیکیورٹی اقدامات مزید سخت کیے جا رہے ہیں۔