وائٹ ہاؤس نے تصدیق کی ہے کہ امریکی صدر ڈونلڈ ٹرمپ اور ان کی ٹیم گرین لینڈ کو حاصل کرنے کے لیے مختلف آپشنز پر غور کر رہی ہے جن میں امریکی فوج کے استعمال کا امکان بھی شامل ہے۔

برطانوی خبر رساں ایجنسی کے مطابق آرکٹک خطے میں روس اور چین کی بڑھتی ہوئی دلچسپی کے باعث صدر ٹرمپ ایک بار پھر گرین لینڈ کو امریکی اسٹریٹجک مرکز بنانے کے خواہاں ہیں۔ وائٹ ہاؤس کا کہنا ہے کہ صدر ٹرمپ گرین لینڈ کے حصول کو امریکی قومی سلامتی کی ایک اہم ترجیح سمجھتے ہیں جو خطے میں مخالف طاقتوں کے اثر و رسوخ کو محدود کرنے کے لیے ضروری ہے۔

وائٹ ہاؤس کے ترجمان نے رائٹرز کے سوالات کے جواب میں کہا کہ صدر اور ان کی ٹیم اس خارجہ پالیسی ہدف کے حصول کے لیے تمام ممکنہ آپشنز پر غور کر رہی ہے اور بطور سپریم کمانڈر امریکی فوج کے استعمال کا اختیار بھی موجود ہے۔

ایک سینئر امریکی عہدیدار کے مطابق گرین لینڈ کے حصول سے متعلق مشاورت اوول آفس میں جاری ہے جہاں مشیران مختلف حکمت عملیوں پر غور کر رہے ہیں۔ ان کا کہنا تھا کہ نیٹو رہنماؤں کی جانب سے گرین لینڈ کی خودمختاری کے حق میں سخت بیانات کے باوجود صدر ٹرمپ اپنے مؤقف سے پیچھے نہیں ہٹے۔

واضح رہے کہ گرین لینڈ کی قیادت متعدد بار اعلان کر چکی ہے کہ وہ امریکا کا حصہ بننے میں کوئی دلچسپی نہیں رکھتی۔

اقوام متحدہ کا رکن ممالک کی علاقائی سالمیت کے احترام پر زور

یہ بیان ایسے وقت سامنے آیا ہے جب صدر ٹرمپ ایک انٹرویو میں کہہ چکے ہیں کہ امریکا کو دفاعی مقاصد کے لیے گرین لینڈ کی اشد ضرورت ہے اور وہ اس مقصد کے لیے فوجی یا معاشی دباؤ کے امکانات کو بھی مسترد نہیں کرتے۔