فیصل آباد کی تحصیل سمندری میں بس اور آئل ٹینکر کے درمیان تصادم کے نتیجے میں بس الٹ گئی جس کے باعث 17 افراد زخمی ہو گئے۔ ریسکیو 1122 کے مطابق حادثے میں 12 افراد کو معمولی چوٹیں آئیں جنہیں موقع پر ہی طبی امداد فراہم کی گئی جبکہ 5 شدید زخمیوں کو تشویشناک حالت میں ٹی ایچ کیو اسپتال منتقل کر دیا گیا۔
ریسکیو حکام کے مطابق تشویشناک حالت میں اسپتال منتقل کیے گئے زخمیوں میں محمد عظیم (23)، نسرین بی بی (21)، تاج مائی (60)، محمد عمر (30) اور رضیہ بی بی (65) شامل ہیں۔ دیگر زخمیوں میں مرد، خواتین اور بچے بھی شامل ہیں جنہیں ابتدائی طبی امداد دی گئی۔
حادثے کی اطلاع ملتے ہی پولیس اور ریسکیو ٹیمیں موقع پر پہنچ گئیں، جائے وقوع سے شواہد اکٹھے کر لیے گئے ہیں اور قانونی کارروائی جاری ہے۔ پولیس حکام کا کہنا ہے کہ حادثے کی وجوہات کا تعین کیا جا رہا ہے۔