سینیٹ کی قائمہ کمیٹی برائے ریلوے کے چیئرمین کے انتخاب کے لیے اجلاس پارلیمنٹ ہاؤس اسلام آباد میں منعقد ہوا۔ اجلاس میں سینیٹر شہادت اعوان، سینیٹر اشرف علی جتوئی، سینیٹر دوست علی جیسار، سینیٹر روبینہ خالد اور سینیٹر ناصر محمود نے بھی شرکت کی۔
اجلاس کے دوران سینیٹر دوست علی جیسار نے سینیٹر شہادت اعوان کا نام چیئرمین سینیٹ قائمہ کمیٹی برائے ریلوے کے لیے پیش کیا، جس کی سینیٹر اشرف علی جتوئی نے تائید کی۔ کمیٹی کے اراکین نے متفقہ طور پر سینیٹر شہادت اعوان کو چیئرمین منتخب کرلیا۔
کمیٹی کے تمام اراکین نے نومنتخب چیئرمین کو مبارکباد دی اور ان کے ساتھ مکمل تعاون کی یقین دہانی کرائی۔ اراکین کا کہنا تھا کہ سینیٹر شہادت اعوان کی قیادت میں کمیٹی مزید فعال اور مؤثر کردار ادا کرے گی۔
اس موقع پر نومنتخب چیئرمین سینیٹر شہادت اعوان نے کمیٹی اراکین کا اعتماد کرنے پر شکریہ ادا کیا اور اس عزم کا اظہار کیا کہ قائمہ کمیٹی عوامی مسائل کے حل کے لیے مؤثر اقدامات جاری رکھے گی۔