سانحہ گل پلازہ کی فائل بند ہوئی تو استعفیٰ دے کر چلا جاؤں گا، گورنر سندھ

گورنر سندھ کامران ٹیسوری کا کہنا ہے کہ تمام تاجروں نے مجھ سے کہا ہے کہ وہ گل پلازہ کے دکانداروں کی مدد کے لیے تیار ہیں۔

حالیہ پریس کانفرنس کے دوران گورنر سندھ کامران ٹیسوری کا کہنا تھا کہ آگ لگنے کے فوراً بعد میں نے اپنے عملے کو موقع پر جانے کی ہدایت کی، ہم نے بلیم گیم نہیں کرنی، تاجر برادری جو زخم کھا کر بیٹھی ہے ہمیں اس پر مرہم رکھنا ہے اور مرہم رکھنے کے لیے ہمیں عملی طور پر ان کے ساتھ کھڑا ہونا ہوگا۔

گورنر سندھ کا کہنا تھا کہ گل پلازہ میں روزانہ 10 ہزار لوگ آتے تھے جبکہ پلازہ کی مینجمنٹ سے بھی بات کرنی ہوگی۔

کامران ٹیسوری کا کہنا تھا کہ ہم ایک دوسرے کو نیچا دکھانے کے چکر میں بہت آگے جا چکے ہیں، ایسے واقعات کی روک تھام کے لیے قانون موجود ہے مگر عملدرآمد نہیں ہوتا، یہ وقت تاجر برادری کے ساتھ کھڑے ہونے کا ہے۔

ان کا کہنا تھا کہ ہم صرف سانحات پر میٹنگ کرتے ہیں، کمیٹی بناتے ہیں اور پھر فائل بند ہوجاتی ہے۔

انہوں نے اعلان کیا کہ اب یہ فائل بند نہیں ہوگی اور اگر یہ فائل بند ہوئی تو میں استعفیٰ دے کر چلا جاؤں گا۔