کراچی کے ایم اے جناح روڈ پر واقع گل پلازہ میں پیش آنے والی المناک آتشزدگی نے جہاں شہر کو سوگ میں مبتلا کر دیا، وہیں تباہی کے مناظر کے درمیان ایک حیرت انگیز منظر بھی سامنے آیا ہے۔
گل پلازہ میں آگ بجھنے کے بعد ملبہ ہٹانے اور لاپتا افراد کی تلاش کا کام جاری ہے۔ اسی دوران سرچ آپریشن میں مصروف ایک ریسکیو اہلکار کی بنائی گئی ویڈیو سوشل میڈیا پر تیزی سے وائرل ہو رہی ہے۔
ویڈیو میں دیکھا جا سکتا ہے کہ دھوئیں سے بھرے ماحول میں جب ریسکیو اہلکار گل پلازہ کی مسجد میں داخل ہوئے تو وہاں رکھے قرآنِ پاک معجزانہ طور پر بالکل محفوظ حالت میں ملے۔ ریسکیو اہلکاروں نے قرآنِ پاک کو احترام کے ساتھ اٹھا کر محفوظ مقام پر منتقل کر دیا۔ حکام کے مطابق آگ سے مسجد کو بھی کوئی نمایاں نقصان نہیں پہنچا۔
ریسکیو حکام کا کہنا ہے کہ گل پلازہ کے پہلے فلور پر قائم مسجد کو کلیئر کر دیا گیا ہے اور وہاں کوئی شخص موجود نہیں تھا۔
واضح رہے کہ گل پلازہ میں ہونے والی ہولناک آتشزدگی کے نتیجے میں قیمتی جانوں کا ضیاع اور بھاری مالی نقصان ہوا ہے۔ اس سانحے میں اب تک 26 اموات کی تصدیق ہو چکی ہے جبکہ واقعے کے بعد 83 افراد تاحال لاپتا ہیں جن کی تلاش کے لیے ریسکیو کارروائیاں بدستور جاری ہیں۔