پیٹرول پمپ ڈیلرز ایسوسی ایشن نے ایک بار پھر حکومت کو خبردار کیا ہے کہ اگر ڈیلرز کے مارجن میں اضافہ نہ کیا گیا تو ملک بھر میں پیٹرول پمپس بند کیے جا سکتے ہیں۔
اسلام آباد میں پریس کانفرنس کرتے ہوئے چیئرمین پیٹرول پمپ ڈیلرز ایسوسی ایشن سمیع خان نے کہا کہ پیٹرولیم مصنوعات کی قیمتوں میں مسلسل اضافے کے باوجود ڈیلرز کا مارجن نہیں بڑھایا گیا، جس کے باعث پیٹرول پمپ مالکان کے لیے اخراجات پورے کرنا مشکل ہوگیا ہے۔
انہوں نے کہا کہ موجودہ مارجن انتہائی کم ہے اور اس کے ساتھ کاروبار چلانا ممکن نہیں رہا۔ ان کا کہنا تھا کہ اگر حکومت نے فوری طور پر ڈیلرز کے مطالبات تسلیم نہ کیے تو پیٹرول پمپ بند کرنے کا آپشن استعمال کرنا پڑے گا۔
اس موقع پر رہنما پیٹرول پمپ اونرز ایسوسی ایشن ہمایوں خان نے کہا کہ حکومت کی پالیسیوں نے پیٹرول پمپ ڈیلرز کے کاروبار کو شدید نقصان پہنچایا ہے۔ انہوں نے کہا کہ پیٹرول کی قیمتوں میں اضافہ تو کیا جاتا ہے، لیکن ڈیلرز کا مارجن جوں کا توں رکھا گیا ہے۔
ہمایوں خان کا کہنا تھا کہ اگر حکومت نے ڈیلرز کا مارجن نہ بڑھایا تو پیٹرول پمپس بتدریج خود بخود بند ہونا شروع ہوجائیں گے۔