پاکستان اور فرانس نے لبنان میں جنگ بندی کی خلاف ورزیوں پر شدید تشویش کا اظہار کیا ہے اور خطے میں امن و استحکام کے لیے جنگ بندی کے مکمل نفاذ پر زور دیا ہے۔
ترجمان دفتر خارجہ کے مطابق نائب وزیراعظم و وزیر خارجہ اسحاق ڈار سے فرانس کے وزیر خارجہ Jean-Noel Barrot نے ٹیلیفونک رابطہ کیا۔ اس دوران دونوں رہنماؤں نے لبنان کی صورتحال پر تفصیلی تبادلہ خیال کیا۔
فرانسیسی وزیر خارجہ نے جنگ بندی کو مؤثر بنانے کے لیے پاکستان کی سفارتی کوششوں کو سراہا اور خطے میں امن کے لیے پاکستان کے کردار کی حمایت کا اعادہ کیا۔
اعلامیے کے مطابق دونوں وزرائے خارجہ نے لبنان میں جنگ بندی کی خلاف ورزیوں پر گہری تشویش ظاہر کرتے ہوئے اس بات پر زور دیا کہ جنگ بندی معاہدے کا مکمل احترام اور اس پر مؤثر عمل درآمد ضروری ہے۔
دونوں رہنماؤں نے پاکستان اور فرانس کے دوطرفہ تعلقات کو مزید مضبوط بنانے کے عزم کا اعادہ بھی کیا، جبکہ تجارت اور اقتصادی تعاون بڑھانے پر اتفاق کیا گیا۔
دونوں وزرائے خارجہ نے مستقبل میں بھی قریبی رابطے جاری رکھنے پر اتفاق کیا۔