نیشنل ڈیزاسٹر مینجمنٹ اتھارٹی کے نیشنل ایمرجنسیز آپریشن سینٹر نے ملک بھر میں 12 سے 17 اپریل تک ممکنہ شدید موسمی صورتحال کے پیش نظر الرٹ جاری کر دیا ہے۔
این ڈی ایم اے کے مطابق مغربی ہواؤں کا ایک طاقتور سلسلہ ملک کے بالائی علاقوں پر اثر انداز ہوگا جس کے باعث اسلام آباد، راولپنڈی، لاہور، سیالکوٹ اور دیگر شہروں میں 13 سے 17 اپریل کے دوران گرج چمک کے ساتھ بارش، آندھی اور ژالہ باری کا امکان ہے۔
چترال، دیر، سوات، مانسہرہ اور ایبٹ آباد سمیت خیبرپختونخوا کے مختلف اضلاع میں بھی 12 سے 17 اپریل تک تیز بارشوں اور پہاڑی علاقوں میں برفباری کی پیشگوئی کی گئی ہے۔ گلگت بلتستان اور آزاد کشمیر میں بھی موسم شدید خراب رہنے کا امکان ظاہر کیا گیا ہے۔
این ڈی ایم اے نے شہریوں کو خبردار کیا ہے کہ پہاڑی علاقوں میں لینڈ سلائیڈنگ اور سڑکوں پر پھسلن کے باعث سفر خطرناک ہو سکتا ہے، جبکہ تیز ہواؤں اور آسمانی بجلی سے کمزور عمارتوں اور بجلی کے نظام کو نقصان پہنچنے کا خدشہ بھی موجود ہے۔
محکمہ موسمیات کے مطابق جنوبی علاقوں خصوصاً سندھ اور بلوچستان میں موسم گرم اور خشک رہے گا جبکہ درجہ حرارت میں اضافہ متوقع ہے۔ کراچی میں درجہ حرارت 37 سے 39 ڈگری سینٹی گریڈ تک جا سکتا ہے۔
موسمیاتی تجزیہ کاروں کا کہنا ہے کہ یہ گرمی کی لہر ہیٹ ویو نہیں تاہم رات کے اوقات میں سمندری ہوائیں جزوی طور پر بحال رہیں گی۔ کراچی اور سندھ کے بعض علاقوں میں آئندہ دنوں میں موسم مزید گرم رہنے کا امکان ہے۔