سینئر صوبائی وزیر مریم اورنگزیب نے اسلام آباد میں جاری حالیہ مذاکرات کو ایک تاریخی پیشرفت قرار دیتے ہوئے ملکی قیادت کو خراجِ تحسین پیش کیا ہے۔
اپنے بیان میں انہوں نے کہا کہ یہ مذاکرات پاکستان کی ایک بڑی سفارتی کامیابی ہیں، جن سے دنیا پر واضح ہوا ہے کہ مؤثر سفارت کاری مسلسل رابطے، مکالمے اور سنجیدہ مذاکرات سے ہی ممکن ہوتی ہے۔
انہوں نے وزیراعظم شہباز شریف، چیف آف آرمی اسٹاف عاصم منیر اور نائب وزیراعظم اسحاق ڈار کی قیادت کو سراہتے ہوئے کہا کہ ان کی کاوشوں سے پاکستان عالمی سطح پر ایک ذمہ دار اور قابلِ اعتماد امن مذاکرات کار کے طور پر ابھر رہا ہے۔
مریم اورنگزیب کے مطابق یہ پیشرفت نہ صرف علاقائی استحکام بلکہ عالمی امن کے فروغ میں بھی معاون ثابت ہوگی۔ انہوں نے اس موقع کو پوری قوم کے لیے باعثِ فخر قرار دیتے ہوئے کہا کہ اس سے پاکستان کی پختگی، شائستگی اور عالمی ساکھ مزید مضبوط ہوئی ہے۔
انہوں نے مزید کہا کہ بین الاقوامی مہمانوں کے لیے کیے گئے انتظامات پاکستان کی روایتی مہمان نوازی اور پیشہ ورانہ صلاحیتوں کا عملی مظہر ہیں، اور یہ کہ ملک کا مستقبل قومی مفاد کو مقدم رکھنے والی قیادت کے ہاتھوں میں محفوظ ہے۔