پنجاب حکومت نے بائیکرز سبسڈی منصوبے کے لیے محکمہ خزانہ سے 24 ارب روپے کی منظوری طلب کرلی ہے۔ ذرائع کے مطابق محکمہ خزانہ نے اس منصوبے کی سمری منظوری کے لیے وزیراعلیٰ پنجاب مریم نواز کو ارسال کردی ہے اور منظوری کے بعد فنڈز جاری کیے جائیں گے۔
حکام کا کہنا ہے کہ اس منصوبے کے تحت صوبے میں ایک کروڑ 25 لاکھ بائیکرز کو ماہانہ 2000 روپے سبسڈی دینے کا تخمینہ لگایا گیا ہے۔
ذرائع محکمہ ایکسائز کے مطابق حکومت بائیکرز کو فی لیٹر پیٹرول پر 100 روپے تک سبسڈی فراہم کرے گی جبکہ اس اسکیم کے لیے اب تک 80 لاکھ سے زائد موٹر سائیکل سوار رجسٹریشن کرا چکے ہیں۔
اعداد و شمار کے مطابق 1980 سے اب تک پنجاب میں تقریباً 5 کروڑ موٹر سائیکلیں رجسٹرڈ ہو چکی ہیں جبکہ بائیکرز کی رجسٹریشن مکمل ہونے کے بعد سبسڈی کا باقاعدہ آغاز کیا جائے گا۔