لاہور میں منکی پاکس کے کیسز میں اضافہ دیکھنے میں آیا ہے جہاں گزشتہ 24 گھنٹوں کے دوران مزید 2 افراد میں اس مرض کی تصدیق ہوئی ہے۔محکمہ صحت کے مطابق متاثرہ افراد میں ایک مرد اور ایک خاتون شامل ہیں جنہیں طبی نگرانی میں رکھا گیا ہے۔
ذرائع کے مطابق میو اسپتال میں اس وقت منکی پاکس سے متاثرہ 5 مریض زیر علاج ہیں جبکہ رواں سال لاہور میں رپورٹ ہونے والے کیسز کی مجموعی تعداد 30 تک پہنچ گئی ہے۔
طبی ماہرین نے خبردار کیا ہے کہ شہر میں منکی پاکس کا مقامی پھیلاؤ ہو رہا ہے جس کے پیش نظر شہری احتیاطی تدابیر اختیار کریں۔
ماہرین کا کہنا ہے کہ بخار، جسم پر دانے اور دیگر علامات ظاہر ہونے کی صورت میں فوری طور پر قرنطینہ اختیار کیا جائے اور قریبی طبی مرکز سے رجوع کیا جائے تاکہ مرض کے پھیلاؤ کو روکا جا سکے۔