پاکستان نیوی نے مقامی طور پر تیار کردہ جہاز سے داغے جانے والے اینٹی شپ میزائل کا کامیاب تجربہ کر لیا ہے۔ترجمان پاک فوج کے مطابق میزائل نے طویل فاصلے پر اپنے ہدف کو انتہائی درستگی اور رفتار کے ساتھ کامیابی سے نشانہ بنایا۔ اس موقع پر نیول چیف ایڈمرل نوید اشرف نے سائنسدانوں اور انجینئرز کی ٹیم کے ہمراہ فائرنگ کا مشاہدہ کیا۔
آئی ایس پی آر کا کہنا ہے کہ یہ جدید میزائل گائیڈنس سسٹم اور اعلیٰ مینوور ایبلٹی سے لیس ہے جو اسے بدلتے حالات میں خود کو ڈھالنے اور انتہائی درستگی کے ساتھ ہدف کو نشانہ بنانے کی صلاحیت فراہم کرتا ہے۔
ترجمان کے مطابق اس کامیاب تجربے سے پاکستان نیوی کی تکنیکی صلاحیتوں اور آپریشنل تیاری کا عملی اظہار ہوا ہے جبکہ یہ ملک کی سمندری حدود کے دفاع اور خطے میں استحکام کے عزم کی بھی عکاسی کرتا ہے۔
صدر مملکت، وزیراعظم، چیف آف ڈیفنس فورسز اور مسلح افواج کے سربراہان نے اس کامیاب تجربے پر پاکستان نیوی کے جوانوں، سائنسدانوں اور انجینئرز کو مبارکباد دی ہے۔