وزیراعلیٰ سندھ مراد علی شاہ نے کہا ہے کہ پاکستان بنانے میں سندھ کا صف اول کا کردار تھا اور ہمیشہ رہے گا سندھ نے قیام پاکستان سے قبل قرارداد پیش کی تھی۔
مزار قائد پر حاضری کے بعد میڈیا سے گفتگو کرتے ہوئے مراد علی شاہ نے کہا کہ گورنر سندھ اور کابینہ کے ہمراہ مزار قائد پر حاضری دی اور پاکستان کی ترقی و خوشحالی کے لیے دعا کی۔
انہوں نے قوم پر زور دیا کہ قائداعظم کے اصولوں پر عمل کرتے ہوئے متحد رہیں، بھارت نے پاکستان کی طرف میلی نظر سے دیکھا تو پوری قوم متحد ہوگئی۔
وزیراعلیٰ سندھ نے صوبوں کی تشکیل سے متعلق بحث کو پرانا قرار دیتے ہوئے کہا کہ اس کا طریقہ کار آئین میں موجود ہے، اگر کسی نے ایڈونچر کرنا ہے تو سندھ اسمبلی سے قرارداد منظور کرائے۔
مراد علی شاہ نے کہا کہ سندھ کی حفاظت کریں گے اور صوبے کی ترقی کے لیے کام جاری رکھیں گے۔ انہوں نے ذوالفقار علی بھٹو، بے نظیر بھٹو اور بلاول بھٹو کی خدمات کا بھی ذکر کیا۔
وزیراعلیٰ سندھ نے فلسطینیوں پر اسرائیلی مظالم اور مقبوضہ کشمیر میں بھارتی مظالم کی مذمت بھی کی۔