او جی ڈی سی ایل نے تکنیکی مہارت کے ذریعے برسوں سے بند پڑے ایک گیس کنویں کو بغیر کسی غیر ملکی معاونت کے دوبارہ فعال کرنے میں کامیابی حاصل کر لی ہے۔
کمپنی کے مطابق ضلع اٹک کے جند ون گیس کنواں سے اب یومیہ 21 ملین اسٹینڈرڈ کیوبک فٹ گیس کی پیداوار حاصل ہو رہی ہے، جو ایک اہم پیشرفت قرار دی جا رہی ہے۔
او جی ڈی سی ایل کے مطابق یہ کنواں 2019 میں مکینیکل خرابی کے باعث بند ہو گیا تھا اور اس کی یومیہ پیداوار صرف 7 ملین اسٹینڈرڈ کیوبک فٹ رہ گئی تھی جس کے بعد اسے ڈیڈ کنواں تصور کیا جا رہا تھا۔
کمپنی کا کہنا ہے کہ کنویں کو مکمل طور پر مقامی انجینئرنگ اور تکنیکی مہارت کے ذریعے دوبارہ آپریشنل کیا گیا ہے اور نہ صرف اس کی بحالی ممکن ہوئی بلکہ گیس کی پیداوار میں بھی نمایاں اضافہ کیا گیا ہے۔
او جی ڈی سی ایل نے اس پیشرفت سے متعلق حکام اور شیئر ہولڈرز کو باضابطہ خط کے ذریعے آگاہ کر دیا ہے اور اسے توانائی کے شعبے میں ایک اہم سنگِ میل قرار دیا جا رہا ہے۔