نیو اسلام آباد انٹرنیشنل ایئرپورٹ پر سیکیورٹی میں بڑی غفلت سامنے آئی ہے جہاں ایک چینی شہری جعلی ٹکٹ کے ذریعے سیکیورٹی حصار پار کر کے انٹرنیشنل ڈیپارچر بریفنگ ایریا تک پہنچ گیا۔
ذرائع کے مطابق چینی شہری منگ چی اپنے اہل خانہ کے ہمراہ فلائٹ سی زیڈ 8070 کے ذریعے سفر کر رہا تھا۔ مبینہ طور پر اے ایس ایف عملے نے پاسپورٹ کی مکمل جانچ کیے بغیر صرف ٹکٹ دیکھ کر اسے داخلے کی اجازت دے دی۔
بعد ازاں جب وہ واپس جانے لگا تو خارجی دروازے پر چیکنگ کے دوران اس کے جعلی طریقے سے داخل ہونے کا انکشاف ہوا جس پر سیکیورٹی عملے نے اسے حراست میں لے کر کنٹرول روم منتقل کر دیا اور بعد میں ایئرپورٹ پولیس کے حوالے کر دیا گیا۔
حکام کے مطابق واقعے کی تحقیقات شروع کر دی گئی ہیں جبکہ اس نوعیت کی سیکیورٹی خلاف ورزی کو انتہائی سنجیدہ قرار دیا جا رہا ہے۔