اسلام آباد میں وزارتِ آبی وسائل کے ذرائع کے مطابق پاکستان نے دریائے چناب میں پانی کی آمد میں ہونے والی بڑی کمی پر بھارت سے باضابطہ وضاحت طلب کرلی ہے۔
پاکستان کا مؤقف ہے کہ ہیڈ مرالہ کے مقام پر پانی کے بہاؤ میں یہ کمی سندھ طاس معاہدے کی شقوں کے منافی ہے اور بھارت کی جانب سے معاہدے کی واضح خلاف ورزی کی گئی ہے۔
پاکستانی انڈس واٹر کمشنر نے اس معاملے پر اپنے بھارتی ہم منصب سے رابطہ کر کے صورتحال کی مکمل تفصیلات طلب کی ہیں۔
وزارتِ آبی وسائل کا کہنا ہے کہ دریائے چناب میں پانی کی مقدار میں غیر معمولی کمی سندھ طاس معاہدے کے طے شدہ طریقہ کار سے مطابقت نہیں رکھتی، جس پر پاکستان نے اپنے تحفظات ریکارڈ کرا دیے ہیں۔