حکومت نے ملک بھر کے 79 اضلاع میں رواں ماہ خصوصی انسداد پولیو مہم چلانے کا فیصلہ کرلیا ہے، جو 18 تا 24 مئی جاری رہے گی۔
نیشنل پولیس ایمرجنسی آپریشن سینٹر کے مطابق مہم کے دوران ایک کروڑ 90 لاکھ بچوں کو پولیو سے بچاؤ کے قطرے پلانے کا ہدف مقرر کیا گیا ہے۔ یہ خصوصی مہم پاکستان کے ساتھ ساتھ افغانستان میں بھی بیک وقت منعقد کی جائے گی۔
اعداد و شمار کے مطابق پنجاب کے 10 اضلاع میں 61 لاکھ 90 ہزار بچوں کو قطرے پلائے جائیں گے، جبکہ سندھ کے 20 اضلاع میں 57 لاکھ 90 ہزار بچوں کو حفاظتی قطرے دیے جائیں گے۔
اسی طرح خیبر پختونخوا کے 23 اضلاع میں 46 لاکھ 10 ہزار بچوں کو پولیو ویکسین دی جائے گی، جبکہ بلوچستان کے 25 اضلاع میں 19 لاکھ 90 ہزار بچوں کو انسداد پولیو قطرے پلانے کا ہدف مقرر کیا گیا ہے۔
وفاقی دارالحکومت اسلام آباد میں بھی 4 لاکھ 50 ہزار بچوں کو پولیو سے بچاؤ کے قطرے پلائے جائیں گے۔
قومی پولیو ایمرجنسی آپریشن سینٹر کا کہنا ہے کہ بچوں کو پولیو سے محفوظ مستقبل فراہم کرنا ہم سب کی مشترکہ قومی ذمہ داری ہے، اور اس مہم کی کامیابی کے لیے والدین کا تعاون نہایت ضروری ہے۔